شكل الهموم بدأت تقل

مش عارف أبدأ منين. جه في بداية دماغي إن الناس بتقول إن أنت تكتب عن حاجات أنت ممتن ليها كل يوم وفيه apps بتديك templates كدا تحاول تجمع فيها الحاجات اللي حصلت في اليوم.

بس أنا مهتم أكتر هنا أكتب عن إحساس حسيت أني عايز اكتب عنه مش bullet points، النهاردة أنا رحت الچيم… كنت روحت امبارح برضه، بس زقيت نفسي فشخ أني أروح النهاردة عشان أبدأ streak ثلاث أيام في الأسبوع. نزلت جريت مع رفيقة دربي اللي ممتن ليها فشخ على وجودها في حياتي، طبختلها انهاردة ودي حاجة اكتشفت أني بحبها، عملت ستيك وشاي كرك كان نفسها فيه.

كان أسبوع شديد في الشغل على رأي صاحبي ح وهنا هفكر نفسي بأني محتاج أغير عتبة.

كان عندي challenge بحاول أهرب منه طول اليوم: إني أحضر للإنترفيو اللي عندي. فكرة إن أنا أبدأ أخش الإنترفيوهات ده في حد ذاته نجاح… خطوة في طريق إني أطلع برا الـ loop اللي أنا كنت فيها وهي محاولة أحسّن وضعي في الشغل بينما أنا في أغلب الظن بهرب من إنّي أعمل إنترفيوهات وأدور على شغل جديد.

أنا ممتن إني لسه بحاول، وممتن إنه بالرغم من كل الصعوبات اللي عدت في السنة اللي فاتت

الإصابات اللي تعرضت لها والعملية اللي عملتها—إني رجعت أروح الچيم تاني بعد غياب أكتر من 150 يوم. وروحت الچيم وفي نفس الوقت وأنا في الچيم حضرت للإنترفيو ولقيت طريقة أعرف أركز فيها أو أسهّل بيها إني أخلص حاجة بحاول أأجلها لكذا يوم.

ممتن لصاحبي ي اللي أعرفه من حوالي 16 سنة. الصداقة اللي فيها feature كدا أن مهما كان في بيننا ups and downs، بس قادر إن أتكلم معاه كل مرة عادي كأننا بنتكلم طول الوقت.

ممتن لأغنية سمعتها انهاردة on-repeat بالرغم من عشوائية كونها تتر مسلسل فخر الدلتا بس صوت ريهام عبد الحكيم وألحان خالد حماد خدوا البرجر في حتة تانية.

طول ما في في العمر عمر

وطول ما في الأيام أيام

وطول ما في النفس نفس

هفضل أزقني لقدام

ـــــــــــــــــــــــــــــــــــــــ

اجمد يا واد اجمد يا واد

اجمد يا واد وإياك تمل

شكل الهموم بدأت تقل